زامان دیللندی
ســــؤيله ديم ســـيريمي تاريخــه ، زامان ديللنــدي
قوپــدي تــوفان بلا ، كون و مكــــان ديلـــلندي
ايستــه ديم ســيريمي بــير محـــرمه عونـــوان ائله يم
سيــر اؤزو درده گلـــيب،ائتــدي فغــان ديللندي
درد ديل ائتمه يه قـــالخديم بـــير اوجا داغ باشينا
دولـدي تــئز غمــلي ياغيــشلارلا دومــان،ديللندي
ساحيــله دوشدو يولوم ايســـته دي كؤنلوم ديل آچا
دالغـــالار جوشـــدي آجيغــلاندي عيــــان،ديللندي
بير پايـــــيز آخشـــامي،اورماندا گــزيرديم دردلي
ساري يارپاقــــلي آغاجــــلاردا گومـــان،ديللندي
پــير مئيخانه ني گــؤردوم اوره گـيم قان اولـــدو
باخـــدي معنــــالي باخيــشلا نيگـــران ،ديللنــدي
دئــدي ـ اي خستـــه كؤنول يوخــدو بو دونيـاده هله
بيــر قولاق كــي ائشــيده ســـير نهـــان ، ديـللندي
ســـيرووي آچمـــاگيــلن هــر گلــــنه ، هر گئــد نه
اولا هر چنــــد او كـــس پــيـر موغـــان،ديللنــدي
بــو سببـــدن دي كـــي من آديــــمي حســرت قويدوم
بو آدي وئردي منــــه بـاد خــــــزان ، ديللنــدي
اورمان = جنگل
دريای رحمت
او قـدري آه چكـديم كي ، فلـك لر ياندي آهيـمدن
شــيكايت ائيلرم يا رب ، ســنه بخت ســياهيـمدن
كؤنول خسته ، گؤزوم آغلار، خجيل گلديم، ترحوم قيل
پشــيمانم ، خجالتلي ، اوزوم قــاره ، گوناهيمدن
نئــجه باش قالديريم؟ شرمنده يم چــيركين عمل لردن
اگر باش قالــديرام عالم دويار شرمي نيـگاهيمدن
اوزون ســتار عيب و ارحــم و رحمــان صيفاتوندور
روا بيــلمه كي خـلق آگاه اولا جـهل و تباهيمدن
مني اؤز باشــيمه يالقـيز بوراخما ، بـس كي نادانم
اگر لوطف ائتمه سون تاپمام ،رهي دهشتلي چاهيمدن
اوميــديله اوزاتديم ال ، ياپيــش قورتار ضلالـتدن
گوناهيم چوخدور عفو ائيله ، اوميديم يوخ صباحيمدن
نولار درياي رحمــت ايچره غرق ائتــسون ، خطاكاري؟
دئــسون : حسـرت ، اوميدون قيرما محشرده پناهيمدن
سيد موسوي
نقاش
سید موسوی
ناز ائتمه قــــــلم ، یاز بو گلســــــتان تولونــــدن
وصــف ائیله گیــلن گولــلری بسـتان تولونــدن
سئیــر ائـیله بهـارینده موغان گــورسننــینـدن
بـــــــاخ گـــوشــــه جنـــاته دهســـتان تولـــوندن
ســـاکین لری ســـادات ، هامیســی اهل حقیقـــت
حــــق راضـی اولا ، حق پرستـــان تــولـــونـدن
نــوردور آغــالار ، مظهــر عفـــتدی خــانیمــلار
عـــاجزدی قلـــم یازســــا مهســـتان تــولــوندن
علــم اهلی ، ادب اهــلی ، قلــم اهلــیده چــوخدور
سایــماق نه چتیـــندور قـــلمســتان تــولــونــدن
خـاقانیه رحمـــت کی ائـدیـب مدرســه تاسیس
تــاریــــخ یازوبـدور او دبســتـان تــولـونـدن
موسیقی ده ، صنعتده ، هونـــرده یئتیـــریلمیـش
اوستــادلـــره بــاخ هــونــریســتان تــولـونــدن
عـالیـم لری، شــاعیـرلرِی ایــرانـدا آد آچمیــش
حقــدن دانیشـــانلاردی نیســــتان تــولـونــدن
فخــریم بــودور عـالمـده دئسـونلر کی بو حسرت
شعــر اهلــی اولــوبــدور شکرستــان تولـونـدن
سید موسوی
تعداد بازديد: [13813] | نسخه قابل چاپ